പൂജപ്പുര ശ്രീ സരസ്വതി ദേവീക്ഷേത്രം നവരാത്രി മഹോത്സവം 2025.

തിരുവനന്തപുരം : ചരിത്രപ്രസിദ്ധവും, പുണ്യപുരാതന ക്ഷേത്രങ്ങളിൽ ഒന്നായ പൂജപ്പുര ശ്രീ സരസ്വതി ദേവി ക്ഷേത്രത്തിലെ നവരാത്രി മഹോത്സവം സെപ്റ്റംബർ 22ന് തുടങ്ങി ഒക്ടോബർ 2ന് അവസാനിക്കും. പൂജപ്പുര ശ്രീ സരസ്വതി ദേവി ക്ഷേത്രത്തിന്റെ ഭരണം ജനകീയ സമിതിയുടെ പൂർണ്ണ നിയന്ത്രണത്തിലാണ് പ്രവർത്തിക്കുന്നത്. ക്ഷേത്ര ആചാരാനുഷ്ഠാനങ്ങൾ പ്രകാരമുള്ള എല്ലാ പൂജാദി കർമ്മങ്ങളും ചിട്ടയായി നിർവഹിക്കുന്ന തോടൊപ്പം ജനകീയ സമിതി നിരവധി സാമൂഹ്യ ക്ഷേമ പ്രവർത്തനങ്ങളും ഏറ്റെടുത്ത് ഭംഗിയായി നടത്തിവരുന്നുണ്ട്. പൂജപ്പുര നവരാത്രി മഹോത്സവ വേളയിൽ ക്ഷേത്രാനുഷ്ഠാന കർമ്മങ്ങൾക്കൊപ്പം വിശേഷാൽ പൂജകളായ ശ്രീ സരസ്വതീ യാമ പൂജ, മഹാസാരസ്വത മംഗള ഹോമം, മഹാസുദർശന ഹോമം, കളഭാഭിഷേകം, പുസ്തക പൂജ, കനക സഭാദർശനം തുടങ്ങിയ പൂജാദി കർമ്മങ്ങൾ തന്ത്രിമുഖ്യൻ ബ്രഹ്മശ്രീ നെല്ലിയോട് വിഷ്ണു നമ്പൂതിരിയുടെ മുഖ്യ കാർമികത്വത്തിൽ നടന്നുവരുന്നു.കൂടാതെ വിജയദശമി ദിനത്തിൽ പൂജപ്പുര വിദ്യാരംഭം, കുമാരസ്വാമി എഴുന്നള്ളിപ്പ്, പതിനായിരക്കണക്കിന് ഭക്തർ പങ്കെടുക്കുന്ന മഹാ കാവടി ഘോഷയാത്ര,അഭിഷേകം, പള്ളിവേട്ട തുടങ്ങിയവ പ്രധാന ചടങ്ങുകളാണ്.

ഒന്നാം ഉത്സവ ദിവസമായ 22ന് വൈകുന്നേരം അഞ്ചുമണിക്ക് ശ്രീചിത്തിര തിരുനാൾ ആഡിറ്റോറിയത്തിൽ നവരാത്രി മഹോത്സവത്തിന്റെ ഉദ്ഘാടന സമ്മേളനം നടക്കും. മന്ത്രി വി. ശിവൻകുട്ടി ഉദ്ഘാടനവും, ഈ വർഷത്തെ വാണിമണി പുരസ്കാരം ഗായകൻ എം. ജയചന്ദ്രന് സമ്മാനിക്കുകയും ചെയ്യും. ഡോ:ശശി തരൂർ എം.പി മുഖ്യപ്രഭാഷണം നടത്തും.ചടങ്ങിന് ആശംസകൾ അർപ്പിച്ചു മേയർ ആര്യ രാജേന്ദ്രൻ, മുൻ നിയമസഭാ സ്പീക്കർ എൻ. ശക്തൻ, വാർഡ് കൗൺസിലർ അഡ്വ: വി.വി രാജേഷ്, കരമന ജയൻ,മുൻ മേയർ അഡ്വ:കെ.ചന്ദ്രിക തുടങ്ങിയവർ സംസാരിക്കും. സെപ്റ്റംബർ 22 മുതൽ ഒക്ടോബർ 2 വരെ ശ്രീചിത്തിര തിരുനാൾ ആഡിറ്റോറിയം, ശ്രീ സ്വാതി തിരുനാൾ സരസ്വതി മണ്ഡപം തുടങ്ങിയ ഇടങ്ങളിൽ കലാപരിപാടികളും, സംഗീതക്കച്ചേരി തുടങ്ങിയവ ഉണ്ടായിരിക്കും. വിജയദശമി ഉത്സവ ദിനമായ ഒക്ടോബർ 2 ന് ശ്രീ സ്വാതി തിരുനാൾ സരസ്വതി മണ്ഡപത്തിൽ രാവിലെ 5.30 മുതൽ പതിനായിരക്കണക്കിന് കുരുന്നുകൾക്ക് പ്രഗത്ഭർ ആദ്യാക്ഷരം കുറിക്കും. രാവിലെ 9 മണിക്ക് ഭഗവാൻ വേളിമല കുമാരസ്വാമിക്ക് ഭക്തിനിർഭരമായ സ്വീകരണം കരമന ജംഗ്ഷനിൽ ആചാര അനുഷ്ഠാനങ്ങളോടെ നൽകും. തുടർന്ന് വെള്ളി ക്കുതിരയിലേറിയ കുമാരസ്വാമിയെ എതിരേറ്റ് പൂജപ്പുര മണ്ഡപത്തിൽ കുടിയിരുത്തും.തുടർന്ന് ചെങ്കള്ളൂർ ശ്രീ മഹാദേവക്ഷേത്ര സന്നിധിയിൽ നിന്നും പതിനായിരക്കണക്കിന് ഭക്തർ പങ്കെടുക്കുന്ന മഹാകാവടി ഘോഷയാത്ര നടക്കും. ഉച്ചയ്ക്ക് 2മണിക്ക് സരസ്വതി മണ്ഡപത്തിൽ കാവടി അഭിഷേകം നടക്കും.വൈകുന്നേരം 4. 30ന് ഭഗവാൻ വേളിമല കുമാരസ്വാമിയുടെ തിരിച്ചെഴുന്നള്ളത്തും പള്ളി വേട്ടയും നടക്കും. ഇതോടെ ഈ വർഷത്തെ നവരാത്രി ഉത്സവത്തിന് പരിസമാപ്തിയാകും. പത്രസമ്മേളനത്തിൽ സരസ്വതീദേവി ക്ഷേത്രം ജനകീയ സമിതി പ്രസിഡന്റ് കെ. ശശികുമാർ, സെക്രട്ടറി പി. ഗോപകുമാർ, ട്രഷറർ ടി.എസ്.വിജയകുമാർ, രക്ഷാധികാരികൾ, ഭരണസമിതി അംഗങ്ങൾ തുടങ്ങിയവർ പങ്കെടുത്തു .